Una sociedadi digitalizada e prus aberta a novidadis de dònnia genia, dònnia tanti fait cosas bonas chi tocant arregordadas. Ddoi est unu torrai a sa terra e a is cosa sanas, e de unu pagheddu de tempus stùdiu meda e una bona connoscèntzia funt portendi impresàrius e consumadoris a traballai sa terra, bendi, o comporai produtus naturalis, chentza ‘e cunservantis e de calidadi.

Funt pagus, e a bortas mancu si scerant candu caminaus sbeliaus in sa bia, ma s’agatant e funt nascendi butegas noas e maneras partetzipadas de fai massàritzia “sustenìbili”. In custu blog eus contau sa stòria de sa Bottega di Cibele, de Boteega e de Botteghina de Alighera e de sa panga Podda, totus esèmpius de mudàntzia chi imperant produtus friscus e a km 0.

Oi si presentaus La Rosa del Pane, logu callenti e beni postu in su coru de Casteddu, custa puru est una sienda scrita in su Circuitu Sardex.net.

S’atividadi est cuncordada de Rosalba Camboni e Laura Ariu, is chi s’ant pensau custu logu giai in su 2008.

“Seus abertus in bia Mameli 224 de su 2011”, si contat Laura, “sa bidea fiat sa de bendi produtus de calidadi, sanus e fatus in domu. Circaus cun atentzioni meda is matèrias primas, candu fait a km 0, deghino’ circaus su mellus in continenti. Puntaus a sa calidadi e si praxit finsas a billai totu sa vida de su produtu. Difatis su logu de produtzioni est sa butega, innui eus circau de fai un’ambienti familiari. Si praxit a pensai de èssiri sa butega asuta de domu e cun is crientis teneus un’arrelata familiari diadeurus”.

“Una de is cosas prus togas”, sighit Laura, “est ca no podeus scerai una fàscia de edadi intra de is crientis nostus, custa est una fortza, e forsis ddu depeus a su fatu ca si podit scerai intra de una surra de produtus. Parteus de una variedadi manna de pani: de su traditzionali de sìmbula e de ollu, a is cocois finas a cuddus de farra de trigu nieddu (segale), su pani arabu, su pani biològicu de kamut, su pani de lati, de arrescotu, chena de si­ndi scaresci de su pani tìpicu de sa traditzioni sarda, comenti a su modditzosu o su pistocu”.

No sceti pani. “Proponeus una variedadi manna de ladixeddas (facacce nel mio paese). Circaus de arrespetai e acuntentai totu is abisòngius de is crientis. Si­ndi seus acatadas ca imoi de pagu funt andendi meda is produtus chi portant fibra e integralis, tandus is chi funt bellus a matiri. A prus de is cosas salias, podeus finas cumbidai ai is crientis una variedadi manna de durcis e finsas turtas meda: de is pastissus prus simpris a is turtas de ciuculati, de crema o de mèndula. Finas innoi no nci amancant is acàpius cun sa traditzioni isulana. Intra de is produtus ddoi funt is amaretus, su pani ‘e saba is durcis de mèndula. Po serrai cun sa pasta frisca e su servìtziu de “catering” po dònnia ocasioni”.

Una àtera novidadi est s’atividadi aìnturu de su Circùito Sardex.net. “Amitu de ai arrevolutzionau sa variedadi de is furnidoris e de nci ai fatu imbucai deu etotu, aìnturu de su Circùito, a calincunu furnidori miu, po ti nai s’ingrussu Elledi (Loddo­Dore). Sardex mi donat sa possibilidadi de allogai licuididadi e cun su chi bendu in sardex agiudu s’economia regionali. Deu po fai unu esèmpiu m’apu assigurau sa màchina cosa mia, apu comporau in potecaria e finsas ande Intimissimi! Ddus imperu chena de diferèntzia peruna cun is èurus.

Furriau in sardu de Tiziana Furcas e torrau a castiai de su Portalitu de sa Lìngua Sarda de sa Provìncia de Casteddu

INSERITO IN:

• Da tutti i Circuiti
• Sardex
• Scritus sardus

Tag:

• butega
• Casteddu
• rosa del pane