Ddu bolis tastai su kebab de Orgòsolo?
Parit una cosa stravanada e invecis est su cumbidu po andai a prandi a su birrifìciu Brewpub Trulla, de Nùgoro. Una dii de istadi, pigaus postu in su terratzu innui sulat unu bentixeddu lèbiu. Apustis de calincunu minutu s’acataus ca s’arrenfriscant de prus is birras, artigianalis, fatas in su locali de Gabriele, Antonio e Bruno Corraine.
Micheli si-ndi betit sa birra biunda, sa scura e s’arrùbia.
Su prenimentu de purpuza (petza de porcu), casu de brebei e tamatas, est imboddicau de pani lentu, su pani carasau passau in su fogu una borta sceti. Sa forma parit sa de su kebab, ma sa sustànzia est unu boboi brabaxinu.
Su Brewpub at abertu nemancus 8 mesi fait, ma est giai unu logu de atòbiu obrigau po is nugoresus e finas po is stràngius. Su birrifìciu nascit de una passioni, sa de is birras artigianalis e de calidadi, acumpangiadas de cosa ‘e papai de atretantis calidadi. “Chi no tenis passioni po custu tipu de cosas- si contat Gabrieli- no fait a sighiri una filera da custa genia, poita no est cosa fàcili a assegurai sa sighidura e s’intreveramentu de is frutus de stasoni. Eus decìdiu de donai importàntzia a sa coxina sarda, est unu impìnniu no sceti siendali”.
“S’iscritzioni a su Circuito Sardex.net nd’est stètia una cunseguèntzia, poita cun s’arretza cumerciali sarda teneus una filosofia comuna. Si seus iscritus poita su Circùitu permitit a totu is siendas sardas de traballai, de tenni intradas e de si torrai s’agiudu. Si donat finas sa possibilidadi de tenni unu fidu chentza de tassu de interessu, e est una grandu cosa.
Iat a essi bellu – dda serrat Gabrieli – chi medas siendas de su nugoresu nci imbuchessint in custa arretza, is potentzialidadis funt mannas, ma sceti chi cresceus totus paris, in nùmuru, in calidadi e in su servìtziu.
Furriau in sardu de Tiziana Furcas e torrau a castiai de su Portalitu de sa Lìngua Sarda de sa Provìncia de Casteddu