B&B Iradas, su mellus de Booking e TripAdvisor

Sa bella noa is meris de su B&B Irada de Lanusei dd’ant donada inderetura a is social. In sa pagina Facebook de sa sienda su post est stètiu fàcili e craru e apretziau meda. Po genti meda est stètia sceti sa cunfirma.

No est sa primu borta ca su B&B Iradas arrìcit presentadas bonas e certificatzionis de ecellèntzia de is situs de viàgiu prus mannus e de instant booking.

In su B&B, s’agatat finas una bacheca me innui is stràngius lassant billeteddus de aprètziu.

Su B&B Irada s’agatat in Lanusei, in su coru de s’Ollasta e in su cumentzu de su mesi ‘e cabudanni at finas arriciu s’atòbiu sportivu de is Ogliastriadi. Su B&B est una domu de genti arrica fata a nou imoi de pagu, totu ingiriada de birdi, in d­unu cungiau de 15000 mq fatu a giardinu, cun matas de fruta e ortus, a pagu tretu de su Padenti Seleni, impitzus de sa bidda de Lanusei. S’agatat a 700 metrus impitzus de su livellu de su mari, in d­unu logu anca si biit totu e finsas còmudu meda.

“Difatis sa valori aciuntu de su B&B est pròpiu su logu me innui s’agatat. Innoi ti podis gosai is fèrias cun pàsiu in s’istadi e finas una vacàntzia de saludi in s’ierru. Seus a pagu tretu de is maris prus bellus e a su pròpiu de is montis prus artus de sa Sardìnnia”, si contat Alessandro Virdis, meri de Iradas.

In su pianu de bàsciu de su B&B s’agatant s’aposentu cumunu, s’aposentu de si pasiai cun divanus, arràdiu, libreria e s’aposentu mannu cun zeminera e televisioni, cun d­unu logu po su cumbidu, mesas còmodas po smurtzai o po si papai sa cosa betia de foras.

“Paris a sa collega mia, ma prima ‘e totu amiga, Marianna, circaus sèmpiri de fai intendi a su crienti comenti in domu sua etotu, e a bortas cuncordaus spetàculus “a sorpresa”. Ocannu eus cuncordau unu cuntzertu de arpa, s’annu passau unu de liutu e boxi, e aìnturu e inforas de su B&B est stètiu finas fatu unu film curtzu.

Innoi bivu e apu bòfiu fai un’imbistimentu. Apu agatau una domu de arrangiai e nd’apu fatu ses aposentus. Seus abertus de tres annus e si­ndi seus acataus ca faeus curiosidadi meda a is stràngius.

Oi su chi si circat est su chi si narat “turismu esperientziali” e su B&B cosa nosta est in d­unu logu bonu po fai esperientzias de dònnia genia. Nc’est a chini in s’istadi circat caletas e prajas, a chini in atòngiu bolit andai a circai cardolinu e a chini in s’ierru nci bolit artziai a monti. Nosu donaus sa possibilidadi de unu logu me innui stai beni, in mesu de sa natura, panoràmicu e a pagu tretu de meda ocasionis.

Furriau in sardu de Tiziana Furcas e torrau a castiai de su Portalitu de sa Lìngua Sarda de sa Provìncia de Casteddu